O pan das ánimas

Abstract

O pan, ademais de cumprir una función alimenticia de primeira orde, está revestido dunha significación simbólica importante. O pan durante a vida axuda a pasa-los límites, a da-lo paso, a integrarse entre os cristiáns por cousa do bautismo e a integrarse no grupo dos homes e mulleres co adaxo da boda, pero o pan axuda, sobre todo, a pasa-lo río Xordán, que é, sen dúbida o límite que separa este mundo do outro; a serpe e as ánimas constitúen un límite e o pan facilita o seu paso. O pan está intimamente ligado á vida do home galego e de xeito especial ós de pasaxe. Os mortos en Galicia non morren senón que emprenden unha viaxe e van comendo pan e castañas. O calendario popular galego é incomprensible se antes non se estudiou a fondo o significado do pan e mailas castañas. As castañas cómense case sempre asadas e o pan cocido. Son as mulleres quen asan as castañas e cocen o pan. As castañas consúmense durante o primeiro período do ano e o pan durante os dous; o consumo ritual das castañas está determinado polo calendario, mentres que o do pan vén dado principalmente polo ciclo de vida do individuo.